FLASH FLOOD SA MINDANAO, PUMATAY NG NAPAKARAMING TAO

Sa isang buong taon, Disyembre ang pinakamasayang buwan para sa buong mundo lalo na sa mga Pilipino, maging mahirap man o mayaman, matanda man o bata. Subalit paanong magiging maligaya ang sinuman sa mga nangyari sa mga tao sa Cagayan de Oro at Iligan noong nakaraang biyernes ng gabi? Oh my God, there were dead bodies along the streets including children. At maraming katawan din ang itinaboy sa dagat. Sa mga oras na ito, itinatayang may halos 500 katao ang nasawi sa nangyaring sakuna. At marami pa ang nawawala na itinatayang umaabot ng 300 katao. Ang nakakalungkot, maraming bangkay ang ‘unclaimed’ pagkatapos ng dalawampu’t apat na oras matapos ang pagbaha, marahil ay nasawi rin ang buong pamilya ng mga ito.

Sa panonood ko nang balita sa telebisyon at pagbabasa ng balita sa internet, labis akong nalulunos sa sinapit ng mga mahal kong kababayan lalo na ang mga bata. Ang mga tao ay nasa lalim ng kanilang mga pagtulog nang dumating mula sa bundok ang nakamamatay na ‘flash flood’ na itinatayang katumbas ng mahigit sa isang buwan na pag-ulan. Sa tindi ng buhos ng ulan na dulot ng bagyong ‘Sendong’ sa loob ng 12 oras, nagkaroon ng matinding pagbaha o ang tinatawag na ‘flash flood’.

Ayon sa isang opisyal ng Civil Defense Office, ang pagkamatay ng marami sa Mindanao ay sanhi marahil ng hindi pagiging handa ng mga mamamayan duon dahil sanay sila na hindi tinatamaan o dinaraanan ng bagyo kahit pa sila ay apat na araw ng binibigyan ng babala ng mga awtoridad na may paparating na bagyo at sila ay dapat na maging handa.

Ang mabilis at matinding 'flash flood' ay malamang na sanhi nang tinatawag nating ‘climate change’. Nawa ay maging aral na ito sa ating lahat ang pangyayaring ito upang huwag nating ipagwalang-bahala ang mga babala ng mga awtoridad. Subali’t kung minsan sadyang may katigasan ang ulo ng marami sa atin o dili naman kaya ay kulang sa kaalaman. Maaaring may partisipasyon din dito ang ating pamahalaan at ang mga lokal na opisyal dahil sa hindi nabibigyan ng sapat na kaalaman ang mga tao lalo na sa epekto ng ‘climate change’ partikular na ang mga nasa probinsiya.

Gaano man kasakit ang dagok na ito sa ating bansa at sa buhay ng mga naulila, tayo ay sama-samang manalangin at umasa na maging sila o tayo man ay makabangon mula sa pagkakalugmok ng dahil sa trahedyang nangyari sa Mindanao.

 
"Educate people about the effects of the changing climate."

 

 

Photos: taipeitimes.com/carbon-offsetting.co.uk